ಪುಲ್ವಾಮಾ ಭಯೋತ್ಪಾದಕ ಕೃತ್ಯಕ್ಕೆ ಪಾಕಿಸ್ತಾನದ ಐಎಸ್‌ಐ ಕಾರಣ ಎಂದ ಕಾಂಗ್ರೆಸ್‌

Share

Tweet

Share

Share

Email

Comments

ಕೇಂದ್ರದಲ್ಲಿ ವಿರೋಧ ಪಕ್ಷವಾಗಿರುವ ಕಾಂಗ್ರೆಸ್, ಪುಲ್ವಾಮಾದ ಭಯೋತ್ಪಾದಕ ಕೃತ್ಯಕ್ಕೆ ಪಾಕಿಸ್ತಾನದ ಗೂಢಚಾರಿ ಸಂಸ್ಥೆ ಐಎಸ್‌ಐ ಕಾರಣ ಎಂದು ಹೇಳಿಕೆ ನೀಡಿದೆ.

“ಐಎಸ್‌ಐ ಭಯೋತ್ಪಾದನೆಯ ವಿನ್ಯಾಸಕ ಹಾಗೂ ಜೈಷ್‌-ಎ-ಮೊಹಮ್ಮದ್‌ ಉಗ್ರ ಸಂಘಟನೆಯ ರಕ್ಷಕ. ಮಸೂದ್‌ ಅಜರ್ ಐಎಸ್‌ಐಯ ರಕ್ಷಣೆಯಲ್ಲಿದ್ದಾನೆ. ಫೆಬ್ರುವರಿ ೧೪ರಂದು ನಡೆದ ಪಾಕಿಸ್ತಾನಿ ಭಯೋತ್ಪಾದನಾ ಕೃತ್ಯಕ್ಕೆ ಜೈಷ್‌-ಎ-ಮೊಹಮ್ಮದ್ ಹೊಣೆಗಾರಿಕೆ ಒಪ್ಪಿಕೊಂಡಿದೆ. ಹಾಗಾಗಿ, ಭಯೋತ್ಪಾದನೆಯ ವಿನ್ಯಾಸಕ ಪಾಕಿಸ್ತಾನದಲ್ಲಿದ್ದು ಭಯೋತ್ಪಾದಕ ಹಲ್ಲೆಗಳನ್ನು ಬೆಂಬಲಿಸುತ್ತಿದ್ದರೆ, ಇದಕ್ಕೆಲ್ಲ ಯಾರು ಹೊಣೆ ಎಂಬುದು ನಮಗೆ ಗೊತ್ತಿದೆ” ಎಂದು ಕಾಂಗ್ರೆಸ್ ಮುಖಂಡ ಕಪಿಲ್ ಸಿಬಲ್ ತಿಳಿಸಿದರು.

ಫೆಬ್ರುವರಿ ೧೪ರಂದು ಅಪರಾಹ್ನ ಸುಮಾರು ೩:೧೫ರ ಹಾಗೆ ಜಮ್ಮು-ಶ್ರೀನಗರ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಸುಮಾರು ೨,೫೦೦ ಮಂದಿ ಸಿಆರ್‌ಪಿಎಫ್‌ನ ಸೈನಿಕರು ೭೮ ಬಸ್ಸುಗಳಲ್ಲಿ ಪಯಣಿಸುತ್ತಿದ್ದರು. ಆಗ ಪುಲ್ವಾಮದ ಲಧು ಮೋದಿ ಲೇತ್ಪೊರಾದಲ್ಲಿ ಪಾಕಿಸ್ತಾನಿ ಭಯೋತ್ಪಾದಕನೊಬ್ಬ ಆತ್ಮಾಹುತಿ ಧಾಳಿಯಲ್ಲಿ ಸ್ಫೋಟಕಗಳನ್ನು ತುಂಬಿದ ವಾಹನವನ್ನು ಈ ಬಸ್ಸುಗಳಿಗೆ ಗುದ್ದಿದ. ಇದರ ಪರಿಣಾಮವಾಗಿ ೪೦ಕ್ಕೂ ಹೆಚ್ಚು ಮಂದಿ ಸೈನಿಕರು ಹುತಾತ್ಮರಾದರು.

ಭಯೋತ್ಪಾದಕ ಕೃತ್ಯ ನಡೆದ ಕೆಲ ಸಮಯದ ನಂತರ ಪಾಕಿಸ್ತಾನದ ಭಯೋತ್ಪಾದನಾ ಸಂಘಟನೆ ಜೈಷ್‌-ಎ-ಮೊಹಮ್ಮದ್ ಹೊಣೆಗಾರಿಕೆ ಒಪ್ಪಿಕೊಂಡಿತು.

ಈ ಹಿನ್ನೆಲೆಯಲ್ಲಿ ಭಯೋತ್ಪಾದಕರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಲೇಬೇಕು ಎಂದು ಅಮೆರಿಕಾ ಸೇರಿದಂತೆ ಹಲವಾರು ರಾಷ್ಟ್ರಗಳು ಪಾಕಿಸ್ತಾನಕ್ಕೆ ಆಗ್ರಹಿಸಿದವು. ಆದರೆ ಪಾಕಿಸ್ತಾನಿ ಪ್ರಧಾನ ಮಂತ್ರಿ ಇಮ್ರಾನ್‌ ಖಾನ್ “ಸಾಕ್ಷ್ಯ ಒದಗಿಸಿ, ನಾವು ಕ್ರಮ ಕೈಗೊಳ್ಳುತ್ತೇವೆ” ಎಂದು ಹೇಳಿ ಬೇಜವಾಬ್ದಾರಿ ಮೆರೆದಿದ್ದಾರೆ.