പ്രയാഗ് രാജ്: കുംഭമേളയിൽ പങ്കെടുത്ത് ഗംഗാസ്നാനം നടത്തിയ പ്രധാനമന്ത്രി നരേന്ദ്രമോദി ശുചീകരണ തൊഴിലാളികളുടെ കാൽ കഴുകി ആദരിച്ചു. ‘സ്വച്ഛ് കുംഭ് സ്വച്ഛ് ആഭാര്‍’ ചടങ്ങിനിടെയാണ് ശുചീകരണ തൊഴിലാളികളെ അദ്ദേഹം ആദരിച്ചത്.
കുംഭമേളയിൽ പങ്കെടുത്ത് ഗംഗാ സ്‌നാനം നടത്തിയ പ്രധാനമന്ത്രി നരേന്ദ്രമോദി, ഗംഗാസ്നാനം നടത്താനുള്ള ഭാഗ്യം ലഭിച്ചുവെന്ന് ട്വിറ്ററിലൂടെ അറിയിച്ചു. 130 കോടി ഇന്ത്യക്കാരുടെ ക്ഷേമത്തിനുവേണ്ടി പ്രാര്‍ഥിച്ചുവെന്നും അദ്ദേഹം വ്യക്തമാക്കി. കഴിഞ്ഞ നാലര വര്‍ഷത്തിനിടെ തനിക്ക് ലഭിച്ച സമ്മാനങ്ങള്‍ ലേലം ചെയ്തതിലൂടെ ലഭിച്ച തുക ഗംഗാ ശുചീകരണത്തിന് ഉപയോഗിക്കുമെന്ന് പ്രധാനമന്ത്രി പറഞ്ഞു.
പ്രയാഗ്‌രാജിലെത്തിയ പ്രധാനമന്ത്രിയെ യു.പി മുഖ്യമന്ത്രി യോഗി ആദിത്യനാഥിന്റെ നേതൃത്വത്തിലാണ് സ്വീകരിച്ചത്.
ഫെബ്രുവരി 14 ന് ബിജെപി അധ്യക്ഷന്‍ അമിത് ഷായും കുംഭമേളയ്‌ക്കെത്തിയിരുന്നു. കേന്ദ്രമന്ത്രി സ്മൃതി ഇറാനി, യു.പി മുന്‍ മുഖ്യമന്ത്രി അഖിലേഷ് യാദവ് തുടങ്ങിയവരും നേരത്തെ കുംഭമേളയില്‍ പങ്കെടുക്കാനെത്തിയിരുന്നു. ജനുവരി 15 ന് തുടങ്ങിയ കുംഭമേള മഹാശിവരാത്രി ദിവസമായ മാര്‍ച്ച് നാലിനാണ് സമീപിക്കുന്നത്.
WhatsApp us