ബ്രിട്ടനോടുള്ള പ്രതികാരമായിട്ടാണ് എണ്ണക്കപ്പല്‍ പിടിച്ചെടുത്തതെന്ന് ഇറാന്‍; അപകടകരമായ പാതയാണ് ഇറാന്‍ തിരഞ്ഞെടുത്തിരിക്കുന്നതെന്ന് ബ്രിട്ടന്റെ മുന്നറിയിപ്പ്; സംഘര്‍ഷം രൂക്ഷം

Share

Tweet

Share

Share

Email

Comments

ടെഹ്‌റാന്‍/വാഷിങ്ടന്‍: ബ്രിട്ടന്‍ കപ്പല്‍ പിടിച്ചെടുത്തതിന് വിശദീകരണവുമായി ഇറാന്‍. തങ്ങളുടെ കപ്പല്‍ ബ്രിട്ടന്‍ പിടിച്ചെടുത്തതിന്റെ പ്രതികാരമായിട്ടാണ് അവരുടെ എണ്ണക്കപ്പല്‍ പിടിച്ചെടുത്തതെന്ന് ഇറാന്‍ വ്യക്തമാക്കി. ഇറാന്‍ അപകടകരമായ പാതയാണ് തിരഞ്ഞെടുത്തിരിക്കുന്നതെന്ന് ബ്രിട്ടന്‍ വിദേശകാര്യ മന്ത്രി ജെറമി ഹണ്ട് മുന്നറിയിപ്പ് നല്‍കി. സൈനിക നടപടികള്‍ കൂടാതെ പ്രശ്‌നം പരിഹരിക്കാനായി ശ്രമിക്കുമെന്നും അദ്ദേഹം പറഞ്ഞു.

ഈ മാസമാദ്യം ഉപരോധം ലംഘിച്ച് സിറിയയിലേക്ക് എണ്ണ കടത്തുന്നു എന്നാരോപിച്ച് ഇറാനിന്റെ ഗ്രേസ് 1 എന്ന എണ്ണക്കപ്പല്‍ ബ്രിട്ടന്‍ പിടിച്ചെടുത്തിരുന്നു. കപ്പല്‍ 30 ദിവസം കൂടി തടങ്കലില്‍ വയ്ക്കാന്‍ ജിബ്രാള്‍ട്ടര്‍ സുപ്രീംകോടതി ഉത്തരവിട്ടിരുന്നു. ഇതിനു തൊട്ടുപിന്നാലെയാണ് ഇറാന്‍ ബ്രിട്ടിഷ് കപ്പല്‍ പിടിച്ചെടുത്തത്.

രാജ്യാന്തര സമുദ്രഗതാഗത നിയമങ്ങള്‍ ലംഘിച്ചെന്ന് ആരോപിച്ച് വെള്ളിയാഴ്ചയാണ് ബ്രിട്ടന്‍ രജിസ്റ്റര്‍ ചെയ്ത സ്റ്റെന ഇംപറോ എണ്ണക്കപ്പല്‍ ഇറാന്‍ പിടിച്ചെടുത്തത്. മീന്‍പിടിത്ത ബോട്ടുമായി കപ്പല്‍ കൂട്ടിയിടിച്ചെന്നും ക്യാപ്റ്റനുമായി ബന്ധപ്പെടാനുള്ള ശ്രമം പരാജയപ്പെട്ടപ്പോള്‍ പിടിച്ചെടുക്കുകയായിരുന്നുവെന്നുമാണ് ഇറാന്‍ അറിയിച്ചിരുന്നത്. എന്നാല്‍ സൗദിയിലേക്ക് പോകുന്നവഴി മുന്നറിയിപ്പ് ഇല്ലാതെ നാല് ചെറുകപ്പലുകളും ഹെലികോപ്റ്ററുകളുമായി കപ്പല്‍ വളയുകയായിരുന്നുവെന്ന് കപ്പല്‍ ഉടമകള്‍ ആരോപിച്ചു.