अमेरिकेच्या दौऱ्यावर असलेले भारताचे पंतप्रधान नरेंद्र मोदी यांनी आज अमेरिकेतील गुंतवणूकदारांना भारतात गुंतवणूक करण्याचे आवाहन केले. आपल्या सरकारने धाडसी निर्णय घेत कॉर्पोरेट टॅक्समध्ये ऐतिहासिक कपात केली आहे, असं सांगून परदेशी गुंतवणूकदारांसाठी ही भारतात गुंतवणूक करण्याची सुवर्णसंधी आहे, असे पंतप्रधान मोदींनी म्हटले आहे. न्यूयॉर्कमधील ब्लूमबर्ग ग्लोबल बिझनेस फोरममध्ये पंतप्रधान बोलत होते.
तुम्ही जर भारतात येऊन मार्केटमध्ये गुंतवणूक करीत असाल तर तेथे स्केल आहे, म्हणून भारतात या. तुम्ही जर स्टार्टअपमध्ये गुंतवणूक करीत असाल तर त्या ठिकाणी मार्केट आहे, म्हणून भारतात या, तुम्ही इन्फ्रास्ट्रक्चरमध्ये गुंतवणूक करण्यासाठी भारतात येऊ शकता, असे मोदी म्हणाले. मोदींनी यावेळी गुंतवणूकदारांसाठी (4Ds) डेमोक्रॅसी, डेमोग्राफी, डिमांड आणि डिसिसीव्हेनसचा मंत्र सांगितला. भारत हा गुंतवणूकदारांसाठी विश्वासू देश आहे. तुम्हाला कुठलीही अडचण आली तर मी स्वतः तुमच्यासाठी उभा राहीन, असेही मोदी यावेळी म्हणाले. अर्थमंत्री निर्मला सीतारामन यांनी काही दिवसांपूर्वीच कॉर्पोरेट टॅक्समध्ये कपात केली होती. भारतात खूप वेगाने शहरांचे आधुनिकीकरण होत आहे. तसेच लेटेस्ट टेक्नोलॉजी आणि इन्फ्रास्ट्रक्चर निर्माण होत आहे. तुम्हाला जर शहरीकरणात गुंतवणूक करायची असेल तर तुमचे भारतात स्वागत आहे. भारतातील संरक्षण क्षेत्रही तुमच्यासाठी गुंतवणूक करण्यासाठी खुले आहे.
व्यापार वाढवण्यासाठी मोदी सरकारने दुसऱ्या कार्यकाळामध्ये तातडीने ५० कायद्यात बदल केले आहेत. केंद्र सरकारने व्यापार वाढीसाठी धाडसी निर्णय घेतल्याची माहितीही मोदी यांनी यावेळी दिली. भारतातील नवीन सरकारला केवळ तीन ते चार महिने झाले आहेत. त्यामुळे मी तुम्हाला आश्वासन देऊ शकतो की ही फक्त सुरुवात आहे. आपल्याला अजून खूप लांबचा टप्पा ओलांडायचा आहे. त्यामुळे तुमच्यासाठी ही सुवर्णसंधी आहे. २०२४-२५ मध्ये भारताच्या अर्थव्यवस्थेचे ५ डॉलर ट्रिलियनचे उद्दिष्ट आहे. गेल्या पाच वर्षात २८६ बिलियन डॉलर परकीय गुंतवणूक झाल्याची माहितीही मोदी यांनी दिली.
WhatsApp us