ಕಾಂಗ್ರೆಸ್ ಅಧ್ಯಕ್ಷ ರಾಹುಲ್ ಅವರ ಭಾವ ರಾಬರ್ಟ್ ವಾಡ್ರಾ ಒಬ್ಬ ಜೋಕರ್ ಎಂದು ಕೇಂದ್ರೀಯ ಮಂತ್ರಿ ಮುಖ್ತರ್ ಅಬ್ಬಾಸ್ ನಕ್ವಿ ಹೇಳಿದ್ದಾರೆ.
ರಾಬರ್ಟ್ ವಾಡ್ರಾ ರಾಜಕೀಯಕ್ಕೆ ಬರುವ ಸಾದ್ಯತೆಯಿದೆ ಎಂಬ ವರದಿಗಳಿಗೆ ಪ್ರತಿಕ್ರಿಯಿಸುತ್ತ ನಕ್ವಿ ಈ ರೀತಿ ಹೇಳಿದರು. “ರಾಹುಲ್ ಮತ್ತು ಪ್ರಿಯಾಂಕಾ ಮುನ್ನಡೆಸುತ್ತಿರುವ (ಕಾಂಗ್ರೆಸ್ ಪಕ್ಷ ಎಂಬ) ಸರ್ಕಸ್‌ನಲ್ಲಿ ಒಬ್ಬ ಜೋಕರ್ ಆಗಮನ ಸರ್ವೇಸಾಮಾನ್ಯ. ಈಗ ಜೋಕರ್ ವೇದಿಕೆಯ ಮೇಲೆ ಬರಲಿದ್ದಾನೆ” ಎಂದು ನಕ್ವಿ ಲೇವಡಿ ಮಾಡಿದರು.
ರಾಹುಲ್ ಸಹೋದರಿ ಪ್ರಿಯಾಂಕಾ ರಾಬರ್ಟ್ ವಾಡ್ರಾ ಸಕ್ರಿಯ ರಾಜಕಾರಣಕ್ಕೆ ಪದಾರ್ಪಣೆ ಮಾಡಿ ಒಂದು ತಿಂಗಳು ಕಳೆದ ನಂತರ ಅವರ ಪತಿ ರಾಬರ್ಟ್ ತಾವೂ ರಾಜಕೀಯ ಸೇರುವ ಮುನ್ಸೂಚನೆ ನೀಡಿದ್ದರು. ಪ್ರಿಯಾಂಕಾ ಸದ್ಯಕ್ಕೆ ಉತ್ತರ ಪ್ರದೇಶದ ಪೂರ್ವ ವಲಯದ ಪ್ರಧಾನ ಕಾರ್ಯದರ್ಶಿಯಾಗಿ ನೇಮಕಗೊಂಡಿದ್ದಾರೆ.
ರಾಬರ್ಟ್ ರಾಜಕೀಯ ಪ್ರವೇಶಿಸಬಹುದು ಎಂಬ ಸುದ್ದಿಗಳು ಹರಿದಾಡಿದ್ದೇ ತಡ, ಉತ್ತರ ಪ್ರದೇಶದ ಮೋರಾದಾಬಾದ್‌ ನಗರದಲ್ಲಿ ರಾಬರ್ಟ್‌ರನ್ನು ಸ್ವಾಗತಿಸುತ್ತಿರುವ ಭಿತ್ತಿಪತ್ರಗಳು ಕಾಣಿಸಿಕೊಂಡವು.
೪೯ ವರ್ಷ ವಯಸ್ಸಿನ ರಾಬರ್ಟ್, ಸದ್ಯಕ್ಕೆ ಮನಿ ಲಾಂಡರಿಂಗ್‌ ಹಗರಣದಲ್ಲಿ ಜಾರಿ ನಿರ್ದೇಶನಾಲಯದ ತನಿಖೆಗೊಳಗಾಗಿದ್ದಾರೆ.
WhatsApp us