കാസര്‍ക്കോഡ്: ബദിയടുക്കയില്‍ പശുക്കടത്ത് ആരോപിച്ച്‌ ഡ്രൈവവറെയും സഹായിയെയും ആക്രമിച്ചു. കര്‍ണാടകയില്‍ നിന്നും കാസര്‍കോട്ടെ ബന്തിയോട്ടേക്ക് പശുവിനെ കൊണ്ടുവരികയായിരുന്ന പിക്ക് അപ്പ് ഡ്രൈവര്‍ ഹംസയേയും സഹായി അല്‍ത്താഫിനെയും മര്‍ദ്ദിച്ച ഏഴംഗ സംഘം പിക്കപ്പ് വാനും അരലക്ഷം രൂപയും പശുക്കളെയും കടത്തിക്കൊണ്ടുപോയി. രണ്ട് പശുവും ഒരു കിടാവുമായിരുന്നു വാഹനത്തില്‍ ഉണ്ടായിരുന്നത്.
കര്‍ണാടക പുത്തൂരില്‍ നിന്നും പശുക്കളെയും കൊണ്ട് വരുന്നതിനിടെ എണ്‍മകജെ മഞ്ചനടുക്കയില്‍ വച്ചാണ് ഇന്ന് രാവിലെ അക്രമമുണ്ടായത്. കാറിലെത്തിയ സംഘം പശുക്കടത്ത് ആരോപിച്ച്‌ മര്‍ദ്ദിക്കുകയായിരുന്നു. ഹോക്കി സ്റ്റിക്കിലുള്ള മര്‍ദ്ദനത്തില്‍ പരുക്കേറ്റ പുത്തൂര്‍ പര്‍പുഞ്ച സ്വദേശികളായ ഹംസ, അല്‍ത്താഫ് എന്നിവരെ കാസര്‍കോട്ടെ സഹകരണ ആശുപത്രിയില്‍ പ്രവേശിപ്പിച്ചു.
പുത്തൂര്‍ കെദിലയിലെ ഇസ്മയില്‍ എന്നയാളാണ് പശുക്കളെ കാസര്‍കോട്ടെ ബന്തിയോട്ടെക്ക് എത്തിക്കാന്‍ ആവശ്യപ്പെട്ടത്. മഞ്ചനടുക്കത്തെ പശുവളര്‍ത്തു കേന്ദ്രം നടത്തുന്ന ഹാരിസിന് നല്‍കാനായി അരലക്ഷം രൂപയും ഇസ്മയില്‍ ഇവരുടെ കൈവശം നല്‍കിയിരുന്നു. പണം കൈമാറാന്‍ എത്തിയപ്പോഴായിരുന്നു അക്രമമെന്ന് ഹംസ പറഞ്ഞു.
ഹംസയും അല്‍ത്താഫും മര്‍ദ്ദനമേറ്റു വിണയുടന്‍ അക്രമി സംഘം പിക്ക് അപ്പ് വാനുമായി സ്ഥലം വിട്ടു. പശുക്കളെ കൊണ്ടുവരുന്നതിനായി കര്‍ണാടക മൃഗസംരണ വകുപ്പിലെ വെറ്റിനറി ഡോക്ടര്‍ നല്‍കിയ സര്‍ട്ടിഫിക്കറ്റ് അടക്കമുള്ള രേഖകളും അരലക്ഷം രൂപയും സംഘം അപഹരിച്ചതായും ഹംസ പറഞ്ഞു. ഇരുവരുടെയും പരാതിയില്‍ ബദിയടുക്ക പൊലീസ് കേസെടുത്തു. ഇതിനിടെ കര്‍ണാടക വിട്ലയില്‍ പിക്ക് അപ്പ് വാന്‍ കണ്ടെത്തിയിട്ടുണ്ട്. ബദിയടുക്ക പൊലീസ് സ്ഥലത്തെത്തി അന്വേഷണം ആരംഭിച്ചിട്ടുണ്ട്. അക്രമത്തിനിരയായവരില്‍ നിന്നു പൊലീസ് മൊഴിയെടുത്തു. ഹ്യുണ്ടായി ഇയോണ്‍ കാറിലെത്തിയവരാണ് അക്രമം നടത്തിയതെന്ന് പൊലീസ് തിരിച്ചറിഞ്ഞിട്ടുണ്ട്. മുമ്ബും കാസര്‍കോഡ് കര്‍ണാടക അതിര്‍ത്തി പ്രദേശത്ത് പശുക്കടത്തിന്റെ പേരില്‍ അക്രമമുണ്ടായിട്ടുണ്ട്.
WhatsApp us